لندن من الاماكن الي ما تمل زيارتها او حتى تكرار نفس الاماكن في كل زياره. بس مرات نبحث عن تجربه جديده نسويها واحنا هناك كنوع من التغيير. هالتدوينة جمعنا لكم قائمة ببعض الاماكن والاشياء الي غير معتاده زيارتها او القيام فيها لانها بعيده عن وسط لندن شوي.

١-  قيادة طائرة صغيره بنفسكم

مستوى الصعوبة: آمنه وممتعه جدا الا في حاله كان عندكم فوبيا مرتفعات فهي ما تناسبكم.

التجربة جدًا حلوه خصوصا اذا تحبون تغامرون شوي. اذا تبون معلومات أكثر، اضغطو هنا لقراءة التدوينه الاخرى عن تجربتنا الشخصيه.

٢- تجربة دورات عمل المخبوزات في مخبز bread ahead ?

مخبز bread ahead من افضل المخابز الي تقدم الدونت في لندن. الحلو انه عندهم كلاسات تعلمك كيف تسويها بنفسك! الكلاسات ممتعه حتى لو ماكنت شخص مهووس بالطبخ مثلي. الكورسات غير محصوره على الدونت فقط. عندهم تعليم لجميع انواع المخبوزات من كوروسان، بيقلز امريكي، خبز وغيرها..

اذا قررتو تحجزون كلاس معهم، انصحكم يكون بفرعهم الي في Borough Market. وقت الحجز بيكون مكتوب تحت كل كلاس وين يتسوى (لهم اكثر من موقع). السبب ان هذا السوق ممتع جدا للتجول والزياره. فيه كثير ماكولات لذيذة تجربونها. تقدرون تزورونه بدون ما يكون عندكم كلاس طبعا.

ملاحظة اخيرة، الكلاسات عليها طلب كثير فضروري تحجزون قبل بفتره اسبوعين على الاقل خصوصا في موسم السياحة.

لمعلومات اكثر وللحجز هذا موقعهم: https://www.breadahead.com/courses

٣- جولات سياحية مميزة وموجودة بس في بريطانيا

• جولة في قصر الملكة The Buckingham Palace Tour

يفتح القصر للزيارة العامه في فترة الصيف وقت سفر الملكه السنوي. في ٢٠١٨، القصر مفتوح من ٢١ جولاي الى ٣٠ سبتمبر والتذاكر لزيارته متوفره للبيع الان. الجولة في القصر بتاخذ منكم تقريبا ساعتين. اذا كنتم من متابعين The Crown على نيتفلكس هالزيارة ضروريه وبتعجبكم جدا!

هذا موقعهم لمعلومات أكثر وحجز التذاكر: https://www.royalcollection.org.uk/visit/the-state-rooms-buckingham-palace

• استديو هاري بوتر The Warner brothers Studio Tour

الي يحب هاري بوتر ضرووري يروح هالمكان. كل شي فيه معد بدقه ويعيشك اجواء الفلم كأنها حقيقة. الاستديو ضخم جدا ومفتوح من ٧ سنوات لكنه للان الاعلى تقييما في العالم من السياح. المكان يبعد عن لندن حوالي ساعه الى ساعه ونصف.

هذا موقعهم لمعلومات أكثر والحجز: https://www.wbstudiotour.co.uk

٤- اطول نفق للتزحلق في العالم (ArcelorMittal Orbit)

توجد الزحليقة في حديقة الملكة ايلزبيث الاولمبية بلندن وتعتبر الاطول في العالم. فعالية ممتعة بتاخذ منكم تقريبا ٤٠ ثانية للتزحلق من أعلى البرج الي يبلغ ارتفاعة ١٧٨ متر. الحديقة تقع في منطقة Stratford وتبعد ساعة تقريبا عن وسط لندن والهايد بارك.

هذا موقعهم لمعلومات أكثر وللحجز:  http://arcelormittalorbit.com/whats-on/the-slide/

٥- زيارة الفعاليات في منطقة لندن للاعمال والمالية city of london

هالمنطقة اخف سياح لكن فيها كثير اشياء حلوه تستاهل الزيارة. تبعد حوالي نص ساعه عن الوسط لندن السياحي والهايد بارك. بعض الاماكن الممتعه وزيارتها مجانية حتى:

سكاي جاردن sky garden : مبنى جميل ومطله على المدينة اكثر من رائع

بوروغ ماركت borough market: من افضل الاسواق الشعبية في لندن. اجواءة حلوه وكثير من الاكل المتوفر يستاهل التجربة.

جسر لندن وجسر التاور: المشي على هالجسرين من التجارب البسيطه الممتعة. مطلها على النهر جميل جدا.

المارينا St Katharine Docks: افضل مكان بالنسبة لي في هالمنطقة. جدا هادي والقوارب الي فيه منظرها لحاله حلو. فيها قهاوي ومطاعم للاستمتاع بعد.

وبس هذي نهاية هالقائمة ?. علمونا عن اي مكان جربتوه وحبيتوه في لندن.