فصل الشتاء بيبدأ قريبا وكالعادة له اجواءه في الرحلات والسفرات. منطقة الخليج بالذات تنتعش كثر وقت الشتاء ومدن مثل دبي وعمان تجذب السياح من كل انحاء العالم. مع انه رحلات القريبة هذي شي لابد منه كل شتوية، الا ان السفرات لاماكن ابعد بعد لها طعم مختلف عن اجازه الصيف. في هالبوست جمعنا قائمة بافضل الوجهات الي ممكن تسافرون لها هالسنة في اجازتكم الشتوية القادمة!

سول, كوريا الجنوبية 

اذا كنتم مخططين تزورون كوريا بحياتكم فهالوقت من افضل الاوقات وبداية الشتاء بالذات. العاصمة جميلة جدًا ومختلفة والرحلة ما راح تخيب ظنكم (اذا خططتو لها زين!). اسواقها مميزة والقهوة هناك من ألذ القهاوي الي بتجربونها خصوصا في برد الشتاء. حتى ان اغلب المقاهي تفتح الى نص الليل. حاجة حلوه بعد ان كوريا ما تحتاج تستخرجون فيزا من بدري بس تاخذونها من المطار اذا وصلتو.

لندن, بريطانيا

ما يحتاج اتكلم ?. شعب الخليج في بريطانيا طوال السنة ما شاء الله. الي يميز لندن في الشتاء ويعطينا عذر نزورها مره ثانية هو مهرجان الونتر وندر لاند الي يبدا من نوفمبر ٢٢ الى جانيوري ٦ هالسنة Hyde Park Winter Wonderland. المهرجانات الشتوية منتشرة في اغلب مدن بريطانيا الكبيرة مثل كاردف ومانشستر ويوركشاير وغيرها بس حق لندن هو اكثرها شهره عند العرب.

أبيسكو, السويد

هالوجهة يتكرر ذكرها في قوائم وجهات فصل الشتاء بسبب الظهور المستمر للشفق القطبي الشمالي. الحديقة الوطنيّة الخاصّة بقرية أبيسكو Aurora Sky Station in Abisko هي افضل مكان لمشاهدة الشفق وتفتح منصه المشاهدة من ٢٩ نوفمبر الى مارتش ٢٠١٨. السويد توفر انشطة أخرى كثيرة غير مشاهدة الشفق مثل الزلاجات الي تجرها الكلاب والصيد.

فكرة خطة: زورو لندن لحضور مهرجان الونتر وندر لاند واحجزو رحله قصيره (يومين او ثلاثة ايام) الى أبيسكو من لندن بتكلفة أقل بكثير (٩٠ باوند للتذكره مع العودة تقريبا?!

أوكلاند, نيوزيلندا

اذا ما مليتو من الصيف أو للحين بخاطركم اجازة على الشواطئ واسترخاء جربو أوكلاند! فصول السنة في نيوزيلندا والجزء الجنوبي لخط الاستواء عموما عكس منطقة الخليج بمعنى اذا عندنا شتاء فعندهم صيف! أوكلاند مدينة جميلة وتناسب الي يحبون يكتشفون أماكن جديدة أو يسوون أنشطة مختلفة. من الظواهر الطبيعية الغريبة والموجودة بشكل خاص في نيوزيلندا هي كهوف ويتومو المضيئة Waitomo Caves‎.

الحلو والعملي في نيوزيلندا انها ما تحتاج فيزا اذا كنتم من الخليج ومساحتها صغيرة ممكن تكتشفونها كلها برحله قصيرة?.

شاهداغ, أذربيجان

اذا كنت شخص يحب التزلج وتبي تغير عن الوجهات المعتادة في أوروبا وغيرها، لازم تزور أذربيجان. المنطقة جبيلة وفيها منتجعات راقية. المنتجع الي قرينا عنه وحبيناه وودنا نجربه هو Pik Palace Hotel, Shahdag. ادخلو وشوفو الانشطة المختلفة الي يوفرها ومناسبة للعائلة أو الازواج أو القروبات.

علمونا وش افضل وجهات الشتاء عندكم؟