دائما كان ودي اجرب اطير طياره بنفسي. في اخر زيارة للندن، رحت رحله نص يوم لمدينة قريبة من لندن farnborough تبعد حوالي ساعه عن وسط لندن وزرت نادي الطيران Blackbushe Flying Club . اخذت القطار السريع الى المدينه (٣٥ دقيقه) بعدين اخذت تاكسي من محطه القطار لمطار النادي الصغير (١٢ دقيقه) وهناك ركبنا الطيارات.

مستوى الصعوبه: التجربة مره امنه وممتعه الا اذا كان عندك خوف من المرتفعات.

فيه اكثر من نوع لتجربة الطيران تتراوح فيها مدة التحليق من ٢٠ الى ٦٠ دقيقه. كل التجارب تعطيكم الفرصه تقودون الطياره بنفسكم والمناظر الي تطلون عليها جميله جدا. بعض التجارب للي يحبون المغامره يكون جزء منها فيه بهلوانات جويه اثناء الطيران مثلا: انقلاب ودوران او ميلان حاد. طبعا مو انتم تسوونها يكون فيه طيار متخصص هو الي يرافقكم بهالتجربة. هالنوع حجزه اصعب ويتطلب ترتيب مسبق وعادة ما يكون متوفر الا بالويكند وقت ما الطيارين المتخصصين متوفرين. فقبل لا تروحون تواصلو مع النادي مباشرة ورتبو معهم كل التجارب الي حابينها.

قائمه كامله بكل الانواع المتوفرة تلقونها على موقعهم هنا: http://blackbusheaviation.com/trial-lessons

الي حبيته في هالتجربه انها تحاكي الواقع تماما وتقريبا تعلمكم كيف تقودون الطياره. النادي هو في الاساس مدرسة تعليم طيران ويصدر رخص طيارين رسميه.

فيه نوادي ثانيه توفر تجارب طيران مماثله مثل London Gliding Club لكن انا شخصيا ما جربتها.

اتمنى لكم طيران ممتع.